09-Mar-2024

ଭୁବନେଶ୍ବର,୯.୩.୨୪(ଭାପ୍ର): ନାଗପୁରଠାରେ ଅନୁଷ୍ଠିତ ନବମ ଜାତୀୟ ମିନିଗଲ୍ଫ ପ୍ରତିେଯାଗିତାରେ ଓଡ଼ିଶା ଉଭୟ ପୁରୁଷ ଓ ମହିଳା ବର୍ଗରେ ସ୍ବର୍ଣ୍ଣ ପଦକ ହାସଲ କରିଛି।  ଏଥିସହ ସାମଗ୍ରିକ ଭାବେ ମହିଳା ଦଳ ଦ୍ବିତୀୟ ସ୍ଥାନ ହାସଲ କରିଥିଲା ବେଳେ ପୁରୁଷ ଦଳ ଚତୁର୍ଥ ସ୍ଥାନ ହାସଲ କରିଛି। ଫଳରେ ପ୍ରତିଯୋଗିତାର ୮ଟି ଶ୍ରେଷ୍ଠ ଦଳ ମଧ୍ୟରେ ରହି ଓଡିଶା ମହିଳା ଓ ପୁରୁଷ ଦଳ ଉତ୍ତରାଖଣ୍ଡରେ ହେବାକୁ ଥିବା ୩୮ତମ ଜାତୀୟ ଖେଳ ପ୍ରତିଯୋଗିତାରେ ଅଂଶଗ୍ରହଣ କରିବ।

୨୪ଜଣିଆ ଓଡ଼ିଶା ଦଳ ୧୨ସ୍ବର୍ଣ୍ଣ, ୨ ରୌପ୍ୟ ଓ ୮ଟି କାଂସ୍ୟ ପଦକ ହାସଲ କରିଛି। ଦଳଗତ ପ୍ରତିଯୋଗିତାରେ ପୁରୁଷ ଦଳର ରିତ୍ବିକ ଆନନ୍ଦ ମିଶ୍ର, ୟାଶରାୟ ପଟ୍ଟନାୟକ, ବୀନିତ ଦାସ, ସୌଭାଗ୍ୟ ଶରଣ, ଅଭିନବ ମହାନ୍ତି ଓ ରୋମିତ ରୋଶନ ପ୍ରଧାନ ଏବଂ ମହିଳା ଦଳର  ଅମ୍ରିତା ଦାସ, ଆଦ୍ୟାଶା ମିଶ୍ର, ପ୍ରିୟଦର୍ଶିନୀ ପ୍ରଧାନ, ସୌମ୍ୟାଶ୍ରୀ ରଥ, ଆସ୍ଥା ପଟ୍ଟନାୟକ ଓ ସୌନ୍ଦର୍ଯ୍ୟା ସ୍ବାଇଁ ସ୍ବର୍ଣ୍ଣ ପଦକ ହାସଲ କରିଛନ୍ତି। ସେହିପରି ମହିଳା ବ୍ୟକ୍ତିଗତ ପ୍ରତିଯୋଗିତାରେ ସ୍ମୃତିେରଖା ସ୍ବାଇଁ ଓ ପୁରୁଷ ବର୍ଗରେରୋମିତ ରୋଶନ ପ୍ରଧାନ ରାଶନ ପ୍ରଧାନ କାଂସ୍ୟ ପଦକ ହାସଲ କରିଥିଲା ବେଳେ ମିକ୍ସଡ ଡବଲ୍ସରେ ବିକାଶ ଚନ୍ଦ୍ର ପଟ୍ଟନାୟକ ଓ ଅଭିପ୍ସା ପଣ୍ଡା ରୌପ୍ୟ ଜିତିଛନ୍ତି।

ଷ୍ଟ୍ରୋକ ଇଭେଣ୍ଟରେ ମହିଳା ଦଳର ପାୟଲ ପଟ୍ଟନାୟକ, ନୂପୁର ପଟ୍ଟନାୟକ, ଅଭିପ୍ସା ପଣ୍ଡା, ଆନିକା ପଟ୍ଟନାୟକ, ଲତା ସମର୍ଥା ଓ ପ୍ରିୟଦର୍ଶନୀ ପ୍ରଧାନ କାଂସ୍ୟ ପଦକ ହାସଲ କରିଛନ୍ତି। ଦଳର ଏହି ସଫଳତାରେ  ଓଡ଼ିଶା ମିନିଗଲ୍ଫ ଆସୋସିଏସନର ସଭାପତି ସତ୍ୟବ୍ରତ ମୀନକେତନ, ଉପସଭାପତି ପ୍ରସେନଜିତ ପତି, ସାଧାରଣ ସମ୍ପାଦକ ବିକାଶ ଚନ୍ଦ୍ର ପଟ୍ଟନାୟକ ଓ ଯୁଗ୍ମ ସମ୍ପାଦକ ପ୍ରଦ୍ୟୁମ୍ନ ବେହେରା ଶୁଭେଚ୍ଛା ଜଣାଇଛନ୍ତି।

ମିନିଗଲ୍ଫ ଫେଡେରେସନ ଅଫ ଇଣ୍ଡିଆ ପକ୍ଷରୁ ଆସନ୍ତା ମେ ମାସରେ ମଧ୍ୟପ୍ରଦେଶରେ ହେବାକୁ ଥିବା ଜୁନିୟର ଓ ସବଜୁନିୟର ପ୍ରତିଯୋଗିତାରେ ଓଡ଼ିଶା ଅଂଶଗ୍ରହଣ କରିବ ବୋଲି ସମ୍ପାଦକ ଶ୍ରୀ ପଟ୍ଟନାୟକ ସୂଚନା ଦେଇଛନ୍ତି।