22-Feb-2024

    

ବ୍ରହ୍ମପୁର,୨୨.୨.୨୪(ଭାପ୍ର):-୫ ଟି ଅଧ୍ୟକ୍ଷ ଭିକେ ପାଣ୍ଡିଆନଙ୍କୁ ପୁଣି ବିରୋଧ । ଆଜି ଭିକେ ପାଣ୍ଡିଆନଙ୍କୁ ପୁଣି ବିରୋଧ କରାଯିବା ସହ ତାଙ୍କ ଉପରକୁ ଟମାଟୋ ମାଡ଼ ହୋଇଛି । ଗଞ୍ଜାମ ଜିଲ୍ଲା ବେଲଗୁଣ୍ଠା ଆମ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମରେ ଜଣେ ଯୁବକ ପାଣ୍ଡିଆନ୍‌ଙ୍କୁ ଟମାଟୋ ଫିଙ୍ଗିଛନ୍ତି । ଟମାଟୋ ଫିଙ୍ଗିବା ସମୟରେ ସଂପୃକ୍ତ ଯୁବକକୁ ପୋଲିସ ଓ କିଛି ବିଜେଡି କର୍ମୀ ଆୟତ୍ତ କରିଛନ୍ତି । ପରେ ଯୁବକ ଜଣଙ୍କୁ ବିଜେଡି କର୍ମୀମାନେ ନିର୍ଧୂମ ମାଡ଼ ମାରିଛନ୍ତି ।

ଟମାଟ ମାଡ଼ କରିଥିବା ବ୍ୟକ୍ତି ଜଣକ କଂଗ୍ରେସର ବୋଲି କୁହାଯାଉଛି । ପୋଲିସ ଯୁବକକୁ ଉଠାଇ ନେବାବେଳେ ବିଜେଡି କର୍ମୀମାନେ ବିଧା ଗୋଇଠା ମାରୁଥିବା ଦେଖିବାକୁ ମିଳିଛି । ତେବେ ଏଠାରେ ପ୍ରଣ୍ନ ଉଠୁଛି ୫ ଟି  ଅଧ୍ୟକ୍ଷଙ୍କ ଏହି କାର୍ଯ୍ୟକ୍ରମରେ ପୋଲିସ ଉପସ୍ଥିତିରେ ବିଜେଡି ର କର୍ମୀମାନେ କିପରି ଯୁବକଙ୍କୁ ମାଡ଼ ମାରୁଛନ୍ତି ? ଆଇନ୍‌କୁ ହାତକୁ ନେଇ କିପରି ଏପରି ବ୍ୟବହାର କରୁଛନ୍ତି ବିଜେଡି କର୍ମୀ ? ଏପରି ଦୃଶ୍ୟ ରାଜ୍ୟ ଆଇନ୍‌ ଶୃଙ୍ଖଳା ବ୍ୟବସ୍ଥା ଉପରକୁ ଅଙ୍ଗୁଳି ଉଠାଇଛି ।

ଅନ୍ୟପଟେ ସଭା ମଞ୍ଚକୁ ଯାଇ ୫ ଟି ଅଧ୍ୟକ୍ଷ ଭିକେ ପାଣ୍ଡିଆନ ମଞ୍ଚରେ କହିଛନ୍ତି, ଏଠାକୁ ସମ୍ମାନ ସହ ହାତ ମିଶାଇବାକୁ ଆସିଛି । ମୁଁ ଜାଣିଛି ୧୦ ଜଣଙ୍କ ଭିତରେ କିଏ ୨ରୁ ୩ଜଣ ମୋତେ ଅଣ୍ଡା ପକାଇବେ, ଟମାଟୋ ପକାଇବେ, କାଳି ପକାଇବେ, ଏବଂ ଚପଲ ପକାଇବେ । ହେଲେ କିଛି ଅସୁବିଧାନାହିଁ, ମୁଁ ଆସିବି ।

ସୂଚନା ଥାଉ କି, ଗତ ଅଗଷ୍ଟ ମାସ ୧୯ ତାରିଖରେ ୫ ଟି  ସଚିବ ଭି. କେ ପାଣ୍ଡିଆନ୍‌ଙ୍କ ଉପରକୁ କାଳିମାଡ଼ ହୋଇଥିଲା । ପୁରୀ ଜିଲ୍ଲା ସତ୍ୟବାଦୀ ଗୋପବନ୍ଧୁ ସ୍ମୃତି ମହାବିଦ୍ୟାଳୟ ନିକଟ ପଡ଼ିଆରେ ଏହି କାଳିମାଡ଼ କରିଥିଲେ ଜଣେ ଯୁବକ । ସେହି ସମୟରେ ୫ ଟି ସଚିବ ଦାୟିତ୍ୱରେ ଥିଲେ ଭି. କେ ପାଣ୍ଡିଆନ୍‌ ।

ପ୍ରଥମେ କାକଟପୁର, ନିମାପଡ଼ା ପରେ ପୁରୀରେ ମିଶନ ଶକ୍ତି କାର୍ଯ୍ୟକ୍ରମ ଜନଶୁଣାଣିରେ ଯୋଗଦେବା ପରେ ସତ୍ୟବାଦୀ ଗସ୍ତ କରିଥିଲେ ଭି. କେ ପାଣ୍ଡିଆନ୍‌ । ତେବେ ସତ୍ୟବାଦୀ ଗସ୍ତ ବେଳେ ଏହି କାଳିମାଡ଼ ହୋଇଥିଲା ।