ଭୁବନେଶ୍ୱର, ୪/୧୧(ଭାରତ ପ୍ରସାରଣ): ସ୍ଥାନୀୟ ରବୀନ୍ଦ୍ର ମଣ୍ଡପରେ ଓଡ଼ିଶା ସଚିବାଳୟ ମିଳିତ ସାଂସ୍କୃତିକ ପରିଷଦ ତରଫରୁ ଆୟୋଜିତ ୨ ଦିନିଆ ବାର୍ଷିକ ଉତ୍ସବ ଆଜି ଉଦଯାପିତ ହୋଇଯାଇଛି l ଉଦଯାପନୀ ଦିବସ କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ l ଗୀତ, ନାଟକ, ନୃତ୍ୟ କ୍ଷେତ୍ରରେ ଓଡ଼ିଆ ମାନଙ୍କର ମେଧାକୁ ସେ ପ୍ରଶଂସା କରିଥିଲେ l ବ୍ୟସ୍ତ ବହୁଳ କାର୍ଯ୍ୟ ମଧ୍ୟରେ ପରିଷଦ ପକ୍ଷରୁ ଏଭଳି ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ଏକ ପ୍ରଶଂସନୀୟ ପଦକ୍ଷେପ ବୋଲି ସେ ପ୍ରକାଶ କରିଥିଲେ l 
ଉପସ୍ଥିତ ଦର୍ଶକ, ସଚିବାଳୟରେ କାର୍ଯ୍ୟରତ କର୍ମଚାରୀ ଓ ସେମାନଙ୍କ ପରିବାରଙ୍କୁ ଭିଜନ ଓଡ଼ିଶାର ସ୍ବପ୍ନ ସମ୍ପର୍କରେ ଉଲ୍ଲେଖ କହିଥିଲେ l ଆମର ମଧ୍ୟମ ବର୍ଗ ଆୟରୁ ଉଚ୍ଚ ଆୟ ବର୍ଗ ହେବା ସ୍ବପ୍ନ ସାକାର ହେବା ଉପରେ ସେ ଗୁରୁତ୍ୱ ଦେଇଥିଲେ l ୨୦୪୭ ସୁଦ୍ଧା ୧ କୋଟି ନିଯୁକ୍ତି ସୁଯୋଗ ପାଇଁ ଲକ୍ଷ୍ୟ ରହିଥିବା ସମ୍ପର୍କରେ ସେ ପ୍ରକାଶ କରିଥିଲେ l ଘରୋଇ ଉତ୍ପାଦନ ବୃଦ୍ଧି ଏବଂ ଆର୍ଥିକ ବିକାଶ ସମ୍ପର୍କରେ ସେ ଗୁରୁତ୍ୱ ଦେଇଥିଲେ l ସେ ଆହୁରି ମଧ୍ୟ କହିଥିଲେ ଯେ, ଆମର ରାଜସ୍ବ ଅଭିବୃଦ୍ଧି ଉଲ୍ଲେଖନୀୟ ରହିଛି ଏବଂ ଆର୍ଥିକ ସ୍ଥିରତା ବଜାୟ ରହିଛି l ବିପୁଳ ଜଳ ସମ୍ପଦ, ଖଣିଜ ସମ୍ପଦ ଭରା ରାଜ୍ୟରେ ବିକଶିତ ଓଡ଼ିଶା ଗଠନରେ ପର୍ଯ୍ୟଟନର ବିକାଶରେ ସେ ଜନ ସାଧାରଣଙ୍କ ସହଯୋଗ କାମନା କରିଥିଲେ l
ଓଡ଼ିଶା ସଚିବାଳୟ ମିଳିତ ସାଂସ୍କୃତିକ ପରିଷଦର ବାର୍ଷିକ ଉତ୍ସବ ଉଦଯାପିତ
କାର୍ଯ୍ୟକ୍ରମରେ ସାଂସ୍କୃତିକ କ୍ଷେତ୍ରରେ ଉଲ୍ଲେଖନୀୟ ଯୋଗ ଦାନ କରିଥିବା ପୁରୁଖା ଏବଂ ଅଭିଜ୍ଞ କର୍ମଚାରୀ ତଥା କର୍ମଚାରୀ ମାନଙ୍କୁ ସମ୍ବର୍ଦ୍ଧନା ଦିଆଯାଇଥିଲା l ଉତ୍ସବରେ ରାଜ୍ୟ ଗୃହ, ଶିଳ୍ପ, ସୂଚନା ଓ ଲୋକ ସମ୍ପର୍କ ବିଭାଗ ହେମନ୍ତ ଶର୍ମା କହିଲେ ଯେ, କାଯ୍ୟ ବ୍ୟସ୍ତତା ମଧ୍ୟରେ ପରିଷଦ ପକ୍ଷରୁ ଏପରି ସୁନ୍ଦର କାର୍ଯ୍ୟକ୍ରମ ଆୟୋଜନ କରାଯିବା ଅତ୍ୟନ୍ତ ଆନନ୍ଦର କଥା l ସଂସ୍କୃତିର ପ୍ରଚାର ପ୍ରସାରରେ ପରିଷଦର ଭୂମିକା କୁ ସେ ପ୍ରଶଂସା କରିଥିଲେ l କାର୍ଯ୍ୟ କ୍ଷେତ୍ରରେ ଶୃଙ୍ଖଳାର ସହ କର୍ତ୍ତବ୍ୟ ନିର୍ବାହ ପାଇଁ ସେ ପ୍ରେରଣା ଦେଇଥିଲେ l
କାର୍ଯ୍ୟକ୍ରମରେ ପରିଷଦର ସଭାପତି ପୀୟୂଷ ରଞ୍ଜନ ପରିଡା, ସାଧାରଣ ସମ୍ପାଦକ ମନୋରଞ୍ଜନ ପଟ୍ଟନାୟକ ଯୋଗ ଦେଇ ବକ୍ତବ୍ୟ ରଖିଥିଲେ l ପରିଷଦର ଉପ ସଭାପତି ଅମୀୟ କୁମାର ଦାସ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ l ପରେ ପରେ ସ୍ବର୍ଗତ ବିଜୟ ମିଶ୍ର ଙ୍କ ରଚିତ ଏବଂ ଡଃ ପ୍ରଶାନ୍ତ ପ୍ରହରାଜ ଙ୍କ ନିର୍ଦ୍ଦେଶନାରେ ନାଟକ "ଅସତ୍ୟ ସହର"ମଞ୍ଚସ୍ଥ ହୋଇ ଥିଲା l କଳାକାର ମାନଙ୍କ ଅଭିନୟ ଉପସ୍ଥିତ ଦର୍ଶକ ମାନଙ୍କୁ ମନ୍ତ୍ରମୁଗ୍ଧ କରିଥିଲା l
ପ୍ରକାଶ ଥାଉକି, ପରିଷଦର ବାର୍ଷିକ ଉତ୍ସବର ପ୍ରଥମ ଦିବସରେ ଶଙ୍କର ତ୍ରିପାଠୀ ଙ୍କ ଦ୍ୱାରା ରଚିତ ଏବଂ ବନ ବିହାରୀ ମହାପାତ୍ର ଙ୍କ ନିର୍ଦ୍ଦେଶିତ ନାଟକ "ଶୁଣିବା ହେଉ ଏ କାହାଣୀ" ମଞ୍ଚସ୍ଥ ହୋଇ ଥିଲା l
