ବନ୍ୟାର କ୍ଷୟକ୍ଷତି ସରକାର ଭରଣା କରିବେ ବୋଲି ଚାଷୀକୂଳର ବିଶ୍ବାସ ନାହିଁ; ଚାଷୀ ଆତ୍ମହତ୍ୟା ତା’ର ପ୍ରମାଣ: କଂଗ୍ରେସ

ଭୁବନେଶ୍ୱର,୨/୧୧(ଭାରତ ପ୍ରସାରଣ): ଗତ ତିନିଦିନ ହେଲା ବନ୍ୟା ପ୍ରଭାବିତ ଗଂଜାମ ଜିଲ୍ଲା ପରିଦର୍ଶନ କରି ପିସିସିର ଅନୁଧ୍ୟାନ କମିଟି ସୋମବାର ସନ୍ଧ୍ୟାରେ ବ୍ରହ୍ପୁର ଗାନ୍ଧୀ ଆଶ୍ରମ ରୋଡ଼ସ୍ଥିତ ଡିସିସି କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ କରିଥିଲେ। ପୂର୍ବତନ ମନ୍ତ୍ରୀ ତଥା ପିସିସି କମିଟିର ଅଧ୍ୟକ୍ଷ ଜଗନ୍ନାଥ ପଟ୍ଟନାୟକ କହିଲେ, ସରକାର ବନ୍ୟା ପରିସ୍ଥିତି ମୁକାବିଲା କରିବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ଉଦ୍ଧାର କାର୍ଯ୍ୟ ଓ ରିଲିଫ ବଣ୍ଟନ ମଧ୍ୟ ନୈରାଶ୍ୟଜନକ। ଚାଷୀ ଆତ୍ମହତ୍ୟା ଘଟଣା ପ୍ରମାଣ କରୁଛି ଯେ, ସରକାର ସ୍ବାଭାବିକ ଅବସ୍ଥା ଫେରାଇ ଆଣି କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଦେବେ ବୋଲି ଚାଷୀକୂଳର ଭରସା ନାହିଁ। ତେଣୁ ସରକାର ତୁରନ୍ତ କ୍ଷୟକ୍ଷତିର ଆକଳନ କରନ୍ତୁ; ସର୍ବଦଳୀୟ ବୈଠକ ଡାକି, ଅଭିଜ୍ଞ ସ୍ବେଚ୍ଛାସେବୀ ଅନୁଷ୍ଠାନଗୁଡ଼ିକୁ ଡାକି ଆଲୋଚନା କରନ୍ତୁ।

ବ୍ରହ୍ମପୁର ସାମ୍ବାଦିକ ସମ୍ମିଳନୀରେ ପିସିସି ଟିମ୍‌ର ଉଦ୍‌ବେଗ

ଏହି ସାମ୍ବାଦିକ ସମ୍ମିଳନୀକୁ ସଂଯୋଜନା କରି ଡିସିସି ସଭାପତି ରଶ୍ମିରଂଜନ ପଟ୍ଟନାୟକ କହିଲେ, ପିସିସି ସଭାପତିଙ୍କ ନିର୍ଦ୍ଦେଶ କ୍ରମେ ଆମେ ଦିଲ୍ଲୀ ରାଲି ଛାଡ଼ି ବନ୍ୟାଂଚଳର ପ୍ରଭାବିତ ଲୋକଙ୍କ ସହାୟତା ପାଇଁ ଫେରିଆସିଛୁ। ଗଂଜାମର ରମ୍ଭାଠୁ ଆରମ୍ଭ କରି ବଡ଼ମାଧବପୁର, ଚିକିଟି ରସୁଲପୁର, ବଡ଼ଡୁମୁଡ଼ା ଆଦି ଅଞ୍ଚଳ ବୁଲିଲୁ। ପିସିସିର ଏକ ପ୍ରତିନିଧି ଦଳ ଦୁଇଦିନ ହେଲା ଗଞ୍ଜାମରେ ବନ୍ୟାଞ୍ଚଳ ପରିଦର୍ଶନ କରିବା ସହ ପ୍ରଭାବିତଙ୍କୁ ରିଲିଫ ବଣ୍ଟନ କାର୍ଯ୍ୟ ତଦାରଖ କରୁଛନ୍ତି। ଆସନ୍ତାକାଲି ଦିଗପହଣ୍ଡି ଅଞ୍ଚଳକୁ ଯିବୁ। ପିସିସି ଟିମ୍ ସ୍ଥିତି ଅନୁଧ୍ୟାନ ସହ କ୍ଷୟକ୍ଷତି ଆକଳନ କରି ଫେରୁଛନ୍ତି। ତା’ପରେ ପିସିସି ସଭାପତି ଭକ୍ତଚରଣ ଦାସ ମଧ୍ୟ ଆସି ରାହୁଲ ଗାନ୍ଧିଙ୍କ ତରଫରୁ ରିଲିଫ ବାଣ୍ଟିବେ। ପାଞ୍ଚଦିନ ହୋଇଗଲାଣି, ସରକାର ଏ ଯାଏ ରିଲିଫ ବାଣ୍ଟୁନାହାନ୍ତି। ଲୋକେ କ’ଣ ମରିଗଲା ପରେ ଏମାନେ ବାଣ୍ଟିବେ ବୋଲି ସେ ପ୍ରଶ୍ନ କରିଥିଲେ।