ଶ୍ରୀନଗର, ଅକ୍ଟୋବର ୩୧: ଜମ୍ମୁ-କାଶ୍ମୀରର ମୁଖ୍ୟମନ୍ତ୍ରୀ ତଥା ନ୍ୟାସନାଲ କନଫରେନ୍ସ ନେତା ଓମାର ଅବଦୁଲ୍ଲା ନିଜ ବ୍ୟକ୍ତିଗତ ଜୀବନରେ ଏକ ନୂଆ ଅଧ୍ୟାୟ ଆରମ୍ଭ କରିଛନ୍ତି। ୫୬ ବର୍ଷୀୟ ଓମାର ଅବଦୁଲ୍ଲା ୪୯ ବର୍ଷୀୟା ସାମ୍ବାଦିକ ନିଧି ରାଜଦାନଙ୍କୁ ବିବାହ କରିଛନ୍ତି। ଶନିବାର ଦିନ ଉଭୟେ ସୋସିଆଲ ମିଡିଆ ଜରିଆରେ ନିଜ ବିବାହ ସମ୍ପର୍କରେ ଘୋଷଣା କରିଛନ୍ତି।
ସୋସିଆଲ ମିଡିଆରେ ବିବାହ ଖବର ଦେଲେ ଓମାର ଅବଦୁଲ୍ଲା
ଓମାର ଅବଦୁଲ୍ଲା ସୋସିଆଲ ମିଡିଆ ପ୍ଲାଟଫର୍ମ 'X'ରେ ନିଜ ପତ୍ନୀ ନିଧି ରାଜଦାନଙ୍କ ସହ କିଛି ଫଟୋ ସେୟାର କରିଥିଲେ। ଫଟୋ ସହିତ ସେ ଲେଖିଥିଲେ, “ଗତକାଲିଠାରୁ ଏକ ନୂଆ ଯାତ୍ରା ଆରମ୍ଭ ହେଲା।”
ଏହି ପୋଷ୍ଟରେ ସେ ନିଧି ରାଜଦାନଙ୍କୁ ମଧ୍ୟ ଟ୍ୟାଗ୍ କରିଥିଲେ।
ଏହାର ଉତ୍ତରରେ ସାମ୍ବାଦିକ ନିଧି ରାଜଦାନ ମଧ୍ୟ ଓମାରଙ୍କ ପୋଷ୍ଟକୁ ସେୟାର କରି ଲେଖିଥିଲେ, “କାମ ସରିଗଲା ବନ୍ଧୁ!” (It's done bro)। ଏହି ମନ୍ତବ୍ୟ ମାଧ୍ୟମରେ ସେମାନଙ୍କ ବିବାହ ଖବରକୁ ସ୍ପଷ୍ଟ କରିଥିଲେ।
ନିକଟ ସମ୍ପର୍କୀୟଙ୍କ ଉପସ୍ଥିତିରେ ହେଲା ବିବାହ ଉତ୍ସବ
ଖବର ଅନୁଯାୟୀ, ଶ୍ରୀନଗରଠାରେ ଅତି ନିକଟ ସମ୍ପର୍କୀୟ ଓ ପରିବାରବର୍ଗଙ୍କ ଉପସ୍ଥିତିରେ ଏହି ବିବାହ ଉତ୍ସବ ଆୟୋଜିତ ହୋଇଥିଲା।ଏହି ଅବସରରେ ଓମାର ଅବଦୁଲ୍ଲାଙ୍କ ପିତା ତଥା ନ୍ୟାସନାଲ କନଫରେନ୍ସର ସଭାପତି ଫାରୁକ୍ ଅବଦୁଲ୍ଲା ଓ ମାତା ମଲ୍ଲି ଅବଦୁଲ୍ଲା ଉପସ୍ଥିତ ଥିଲେ। ଏହା ସହିତ ଓମାରଙ୍କ ତିନି ଭଉଣୀ ଓ ଅନ୍ୟ ପରିବାର ସଦସ୍ୟମାନେ ମଧ୍ୟ ବିବାହ ଉତ୍ସବରେ ଯୋଗ ଦେଇଥିଲେ।
ନିଧି ରାଜଦାନଙ୍କ ପିତା ତଥା ବରିଷ୍ଠ ସାମ୍ବାଦିକ ଏମ୍.କେ. ରାଜଦାନ ଓ ମାତା ସରଳା ରାଜଦାନ ମଧ୍ୟ ଏହି ଉତ୍ସବରେ ସାମିଲ ହୋଇଥିଲେ।
ପାୟଲ ଅବଦୁଲ୍ଲାଙ୍କ ସହ ବିବାହ ବିଚ୍ଛେଦକୁ ସୁପ୍ରିମକୋର୍ଟଙ୍କ ମଞ୍ଜୁରି
ଉଲ୍ଲେଖଯୋଗ୍ୟ ଯେ, ଓମାର ଅବଦୁଲ୍ଲାଙ୍କ ଏହି ବିବାହ ତାଙ୍କ ପୂର୍ବତନ ପତ୍ନୀ ପାୟଲ ଅବଦୁଲ୍ଲାଙ୍କ ସହ ବିବାହ ବିଚ୍ଛେଦ ପରେ ହୋଇଛି।
ଚଳିତ ବର୍ଷ ଜୁଲାଇ ମାସରେ ସୁପ୍ରିମକୋର୍ଟ ଓମାର ଅବଦୁଲ୍ଲା ଓ ପାୟଲ ଅବଦୁଲ୍ଲାଙ୍କ ବିବାହ ବିଚ୍ଛେଦକୁ ଆଇନଗତ ଭାବେ ମଞ୍ଜୁରି ଦେଇଥିଲେ। ଉଭୟଙ୍କର ଦୁଇଜଣ ପୁଅ ଅଛନ୍ତି।
ଦୀର୍ଘ ବର୍ଷ ଧରି ଚାଲିଥିବା ବୈବାହିକ ବିବାଦର ସମାଧାନ ପାଇଁ ଉଭୟ ପକ୍ଷ ପାରସ୍ପରିକ ସହମତିରେ ବିବାହ ବିଚ୍ଛେଦ ପାଇଁ ଆବେଦନ କରିଥିଲେ।
ବରିଷ୍ଠ ଆଇନଜୀବୀ କପିଲ ସିବଲ ଓମାର ଅବଦୁଲ୍ଲାଙ୍କ ପକ୍ଷରୁ ସୁପ୍ରିମକୋର୍ଟରେ ମାମଲା ଉପସ୍ଥାପନ କରିଥିଲେ। ଉଭୟ ପକ୍ଷ ମଧ୍ୟରେ ଆପୋଷ ବୁଝାମଣା ହୋଇଥିବା ଏବଂ ସମ୍ବିଧାନର ଧାରା ୧୪୨ ଅନୁଯାୟୀ ବିବାହ ବିଚ୍ଛେଦ ପାଇଁ ମିଳିତ ଆବେଦନ କରାଯାଇଥିବା କୋର୍ଟଙ୍କୁ ଜଣାଇଥିଲେ।
ଏହାକୁ ଗ୍ରହଣ କରି ସୁପ୍ରିମକୋର୍ଟ ଉଭୟଙ୍କ ସହମତି ଅନୁଯାୟୀ ବିବାହ ବିଚ୍ଛେଦ ଆଦେଶ ଦେଇଥିଲେ।
