03-Feb-2024

● କାଳିଆ ଯୋଜନାରେ ଚାଷୀଙ୍କୁ ଦେଉଛନ୍ତି ୧୮୭୯କୋଟି, ଲୁଟୁଛନ୍ତି ୫୮୭୭ କୋଟି 
● ରାଜ୍ୟ ସରକାର ଚାଷୀ ବିରୋଧୀ

ଭୁବନେଶ୍ୱର,୩ା୨-(ଭାରତ ପ୍ରସାରଣ ନିଉଜ): ରାଜ୍ୟରେ ଦୀର୍ଘ ୨୪ ବର୍ଷ ଧରି ଶାସନ କ୍ଷମତାରେ ଥିବା ନବୀନ-ପାଣ୍ଡିଆନ  ଚାଷୀ ବିରୋଧୀ। ସେମାନେ ଚାଷୀଙ୍କ ସବୁଠୁ ବଡ଼ ଶତ୍ରୁ । ଚାଷୀଙ୍କ ବନ୍ଧୁ ବୋଲି ଦାବି କରୁଥିବା ଏହି ସରକାର ବାସ୍ତବରେ ଚାଷୀଙ୍କୁ ଲୁଟ୍ କରିବାରେ ମାହିର । କାଳିଆ ଯୋଜନାରେ ରାଜ୍ୟର ଚାଷୀଙ୍କୁ ୧୮୭୯ କୋଟି ଟଙ୍କାର ସହାୟତା ଦେଉଥିବାବେଳେ ଚାଷୀଙ୍କଠାରୁ ୫୮୭୭ କୋଟି ଟଙ୍କା ଲୁଟ୍ କରୁଛି । ଆଜି ବିଜେଡି ସରକାର ବିରୋଧରେ ଏଭଳି ସାଂଘାତିକ ଅଭିଯୋଗ ଆଣିଛି କଂଗ୍ରେସ । 
 କଂଗ୍ରେସ ଭବନଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ଶ୍ରୀ ସୁଦର୍ଶନ ଦାସ କହିଲେ ଯେ ରାଜ୍ୟର ବିଜେଡି ସରକାର ଚାଷୀମାନଙ୍କୁ ଯେତିକି ସହାୟତା ଦେଉଛନ୍ତି ବୋଲି ଦାବି କରୁଛନ୍ତି, ତା’ର ତିନିଗୁଣା ଚାଷୀଙ୍କଠାରୁ ଲୁଟୁଛନ୍ତି । କ୍ୟାବିନେଟ୍ ନିଷ୍ପତି ଅନୁସାରେ ୨୦୨୩-୨୪ ବର୍ଷ ପାଇଁ ୭୯ ଲକ୍ଷ ମେଟ୍ରିକ ଟନ୍ ଧାନ ସରକାର କିଣିବେ ବୋଲି ଘୋଷଣା କରିଥିଲେ । ସେହିପରି ୧୨.୩୫ ଲକ୍ଷ ପଞ୍ଜିକୃତ ଚାଷୀଙ୍କଠାରୁ କୁଇଂଟାଲ 
ପିଛା ୨୧୮୩ ଟଙ୍କାରେ ଧାନ କିଣାଯିବ ବୋଲି ନିର୍ଦ୍ଧାରଣ କରାଯାଇଛି । ମଣ୍ଡିରେ ଧାନ ବିକ୍ରି ବେଳେ ଚାଷୀଙ୍କଠାରୁ କୁଇଂଟାଲ ପିଛା ହାରାହାରି ୭କିଲୋ ଧାନ କଟନି ଛଟନି କରାଯାଉଛି, ଯାହାର ମୂଲ୍ୟ ୧୩୫ ଟଙ୍କା । ଅଖା ମିଲ ମାଲିକ ଦେବା କଥା । ମାତ୍ର ଚାଷୀ ତାକୁ ଭରଣା କରୁଛି ଓ ସେ ବାବଦକୁ ୬୪ ଟଙ୍କା ଦେବାକୁ ବାଧ୍ୟ ହେଉଛି । ପୁଣି ଧାନ ବସ୍ତା ଲୋଡିଂ ପାଇଁ କୁଇଂଟାଲ ପିଛା ହାରାହାରି ୧୦ ଟଙ୍କା ଚାଷୀ ଖର୍ଚ୍ଚ କରୁଛି । ଅର୍ଥାତ୍ ମୋଟ୍ ଉପରେ ଚାଷୀ କୁଇଂଟାଲ ପିଛା ୨୨୭ ଟଙ୍କା ହାରାହାରି ଖର୍ଚ୍ଚ କରୁଛି । ୭୯ ଲକ୍ଷ ଟନ୍ ଧାନ ପାଇଁ ସର୍ବମୋଟ୍ ୧୭୯୩ କୋଟି ଟଙ୍କା ଚାଷୀଙ୍କ ଉପରେ ବୋଝ ପଡୁଛି । ଏହା କ’ଣ ଚାଷୀଙ୍କୁ ଶୋଷଣ ନୁହେଁ ବୋଲି ଶ୍ରୀ ଦାସ ପ୍ରଶ୍ନ କରିଛନ୍ତି । ମିଲ ମାଲିକ, ସରକାରୀ ଅଫିସର ଓ ବିଜେଡି ନେତା, ମନ୍ତ୍ରୀଙ୍କ ମଧୁଚନ୍ଦ୍ରିକାରେ ଏସବୁ ଚାଲିଛି । ତେଣୁ ସରକାର ଚାଷୀ ଲୁଟେରା ସରକାର ବୋଲି ଶ୍ରୀ ଦାସ ଅଭିଯୋଗ ଆଣିଛନ୍ତି ।।ପୁନଶ୍ଚ ସ୍ୱାମୀନାଥାନ କମିଟି ସୁପାରିଶ କ୍ରମେ ଧାନ କୁଇଂଟାଲ ପ୍ରତି ସର୍ବନିମ୍ନ ସହାୟକ ମୂଲ୍ୟ ୨୯୩୦ଟଙ୍କା ରଖାଯାଇଥିଲା । ମାତ୍ର ନବୀନ-ପାଣ୍ଡିଆନ ସରକାର ତାକୁ ଏ ପର୍ଯ୍ୟନ୍ତ କାର୍ଯ୍ୟକାରୀ କଲେ ନାହିଁ । କେନ୍ଦ୍ର ସରକାର ମଧ୍ୟ ଏ କ୍ଷେତ୍ରରେ ଓଡ଼ିଶା ବିଧାନ ସଭାର 
ସର୍ବସମ୍ମତି ପ୍ରସ୍ତାବ ଉପରେ ଚୁପ୍ ହୋଇ ବସିଛନ୍ତି । ଫଳରେ ଆଜି ଚାଷୀ କୁଇଂଟାଲ ପିଛା ୨୧୮୩ ଟଙ୍କାରେ ଧାନ ବିକିବାକୁ ବାଧ୍ୟ ହେଉଛି । ମାତ୍ର ବର୍ତମାନ ଚାଷୀ ଗୋଟିଏ କୁଇଂଟାଲ ଧାନ ଉତ୍ପାଦନ କରିବା ପାଇଁ ୨୭୦୦ ଟଙ୍କା ଖର୍ଚ୍ଚ କରୁଛି । ୨୦୧୭ ମସିହାରେ ତାହା ୨୩୪୪ ଟଙ୍କା ଥିଲା । କୁଇଂଟାଲ ପିଛା ଉତ୍ପାଦନ ମୂଲ୍ୟ ଓ ବିକ୍ରି ମୂଲ୍ୟ ଭିତରେ 
୫୧୭ ଟଙ୍କାର ଫରକ, ଯାହା ଚାଷୀଙ୍କ ଉପରେ ପଡୁଛି ବା ଚାଷୀ ଲୁଟ୍‌ର ଶିକାର ହେଉଛନ୍ତି । ଅର୍ଥାତ୍ ୭୯ ଲକ୍ଷ ମେଟ୍ରିକ ଟନ୍ ଧାନରେ ଚାଷୀଙ୍କଠାରୁ ଲୁଟ୍ ଟଙ୍କାର ପରିମାଣ ୪୦୮୩ କୋଟି ଟଙ୍କା । ବିଜେଡି ସରକାର ବର୍ଷକୁ ଚାଷୀଙ୍କଠାରୁ ମୋଟ୍ ୫୮୭୭ କୋଟି ଟଙ୍କା ଲୁଟ୍ କରୁଛନ୍ତି । ଏହା କ’ଣ ନବୀନ-ପାଣ୍ଡିଆନ ସରକାରର ଅସଲ ଚାଷୀ ପ୍ରୀତି ବୋଲି 
ଶ୍ରୀ ଦାସ ପ୍ରଶ୍ନ କରିଛନ୍ତି । ଭାଗ ଚାଷୀମାନଙ୍କ ସମସ୍ୟା କହିଲେ ନସରେ । ସେମାନଙ୍କ ପାଇଁ ମଣ୍ଡିର ଦ୍ୱାର ବନ୍ଦ । ସରକାର ସେମାନଙ୍କ ଧାନ କିଣନ୍ତି ନାହିଁ । କମ୍ ଦାମରେ ସେମାନେ ବେପାରୀଙ୍କୁ ଧାନ ବିକ୍ରି କରିବାକୁ ବାଧ୍ୟ ହୁଅନ୍ତି । ଫସଲ ବୀମାର ସୁବିଧା ଭାଗଚାଷୀଙ୍କୁ ମିଳେ ନାହିଁ । ଆଜି ପର୍ଯ୍ୟନ୍ତ 
ଭାଗଚାଷୀ ଆଇନ୍ ସରକାର ଆଣିଲେ ନାହିଁ । ଏପରିକି ରାଜ୍ୟରେ କେତେ ଭାଗଚାଷୀ ଅଛନ୍ତି, ତା’ର ହିସାବ ମଧ୍ୟ ରାଜ୍ୟ ସରକାରଙ୍କ ପାଖରେ ନାହିଁ । ବଳିଆ ଯୋଜନା ଏମାନଙ୍କ ପାଇଁ କେବଳ ଏକ ପ୍ରତାରଣା ବ୍ୟତିତ ଆଉ କିଛି ନୁହେଁ ବୋଲି ଶ୍ରୀ ଦାସ କହିଛନ୍ତି । 
   ପ୍ରଦେଶ କିଷାନ କଂଗ୍ରେସ ସେଲର ଅଧ୍ୟକ୍ଷ ଶ୍ରୀ ଅମିୟ ପଟ୍ଟନାୟକ କହିଲେ ଯେ ରାଜ୍ୟ ସରକାର ୨୪ବର୍ଷ ଭିତରେ ୨୪ଟି ଶୀତଳ ଭଣ୍ଡାର ନିର୍ମାଣ କରିପାରିନାହାନ୍ତି । ରାଜ୍ୟର ୩୫ ଶତାଂଶ ଜମିକୁ ଜଳସେଚନ ସୁବିଧା ଦେବାର ପ୍ରତିଶ୍ରୁତି ସରକାର ଦେଇଥିଲେ । ମାତ୍ର ତାହା ଏକ ନିଷ୍ଠୁର ପ୍ରତାରଣାରେ ପରିଣତ ହୋଇଛି ବୋଲି ଶ୍ରୀ ପଟ୍ଟନାୟକ କହିଛନ୍ତି ।

ବି ମହାପାତ୍ର,ଭୁବନେଶ୍ୱର