ବନ୍ୟା ପ୍ରପୀଡ଼ିତଙ୍କ ପାଇଁ ୨୦ ହଜାର କୋଟି ଟଙ୍କାର ସ୍ୱତନ୍ତ୍ର ପ୍ୟାକେଜ୍ ଦାବି କଲା କଂଗ୍ରେସ

ଡ଼. ପଟ୍ଟନାୟକ ଆହୁରି କହିଥିଲେ ଯେ, ସରକାର ନିଜର ଗସ୍ତ, ଉତ୍ସବ ଓ ବିଜ୍ଞାପନରେ ଅର୍ଥ ଖର୍ଚ୍ଚ କରୁଛନ୍ତି, କିନ୍ତୁ ବିପନ୍ନଙ୍କ ପାଇଁ ସର୍ବନିମ୍ନ ସହାୟତା ଯୋଗାଇବାରେ ବିଫଳ। ବନ୍ୟା ପ୍ରଭାବିତ ଲୋକଙ୍କୁ ଅନ୍ତତଃ ତିନି ମାସ ପାଇଁ ମାଗଣା ସରକାରୀ ବସ୍ ଯାତ୍ରା ପାସ୍ ଦିଆଯାଉ। ନିକଟରେ ଘୋଷିତ ୨୮ ଲକ୍ଷ ଘର ଯୋଜନାରେ ଏହି ତିନି ଜିଲ୍ଲାର ଘର ହରାଇଥିବା ପରିବାରଙ୍କୁ ସାମିଲ କରିବା ପାଇଁ ତୁରନ୍ତ ସର୍ଭେ କରାଯାଉ।

ଭୂସ୍ଖଳନରେ ଗୋଟିଏ ପରିବାରର ପାଞ୍ଚ ପାଞ୍ଚ ଜଣଙ୍କ ସମେତ ୧୨ ଜଣଙ୍କ ମୃତ୍ୟୁ ଅତ୍ୟନ୍ତ ହୃଦୟବିଦାରକ। ପ୍ରତ୍ୟେକ ମୃତକଙ୍କ ପରିବାରକୁ ୨୦ ଲକ୍ଷ ଟଙ୍କା ଅନ୍ତରୀଣ କ୍ଷତିପୂରଣ ଦିଆଯାଉ। ମାଟି ତଳେ ଆହୁରି ମୃତଦେହ ଥିବା ସନ୍ଦେହ ଥିବାରୁ ବନ୍ଦ ହୋଇଥିବା ଖୋଜାଖୋଜି ଅଭିଯାନ ପୁନର୍ବାର ଆରମ୍ଭ କରାଯାଉ, ଯାହାଦ୍ୱାରା ପରିବାର ସଦସ୍ୟମାନେ ନିଜ ଲୋକଙ୍କ ଶେଷକୃତ୍ୟ କରିପାରିବେ।

କଂଗ୍ରେସ ପକ୍ଷରୁ ଦାବି କରାଯାଇଛି ଯେ, ପ୍ରାଥମିକ ଆକଳନ ଅନୁଯାୟୀ ୧୫ରୁ ୨୦ ହଜାର କୋଟି ଟଙ୍କାର କ୍ଷୟକ୍ଷତି ହୋଇଥିବାରୁ ରାଜ୍ୟ ସରକାର କେନ୍ଦ୍ର ନିକଟରେ ୨୦ ହଜାର କୋଟି ଟଙ୍କାର ସ୍ୱତନ୍ତ୍ର ପ୍ୟାକେଜ୍ ଦାବି କରନ୍ତୁ।

ଶେଷରେ ଡ଼. ପଟ୍ଟନାୟକ କହିଥିଲେ ଯେ, ଆଜି ବିରୋଧୀ ଦଳ ଭୂମିସ୍ତରରେ ଲୋକଙ୍କ ପାଖରେ ଥିବାବେଳେ ସରକାର ଭୂମିଗତ ହୋଇଯାଇଛନ୍ତି। ଏହା ରାଜନୀତି କରିବାର ସମୟ ନୁହେଁ, ବିପନ୍ନଙ୍କ ଜୀବନ ଓ ଜୀବିକା ବଞ୍ଚାଇବାର ସମୟ। ସରକାର ତୁରନ୍ତ ହସ୍ତକ୍ଷେପ କରି ଲୋକଙ୍କୁ ସ୍ୱାଭାବିକ ଜୀବନକୁ ଫେରାଇ ଆଣନ୍ତୁ। 

ଭତ୍ତା ଦେବା କଥା କହି ଲୋକଙ୍କୁ ଉଭୟ କେନ୍ଦ୍ର ଓ ରାଜ୍ୟ ସରକାର ଯେଉଁ ଭୁଆଁ ବୁଲାଉଛନ୍ତି ତାହା ଉପରେ ତଥ୍ୟ ଉପସ୍ଥାପନ କରି ଅନ୍ୟତମ ମୁଖପାତ୍ର ତଥା ପିସିସି ସାଧାରଣ ସମ୍ପାଦିକା ସୋନାଲି ସାହୁ ରାଜ୍ୟ ସରକାରଙ୍କୁ କଡା ସମାଲୋଚନା କରିଛନ୍ତି ।

ସୂଚନାଯୋଗ୍ୟ ପିସିସି ସଭାପତି ଭକ୍ତ ଚରଣ ଦାସଙ୍କ ନିର୍ଦ୍ଦେଶ କ୍ରମେ ଓଡିଶା ପ୍ରଦେଶ କଂଗ୍ରେସ ସେବାଦଳ ଅଧ୍ୟକ୍ଷ ଶୁଭେନ୍ଦୁ ମହାନ୍ତି ଓ ସାଧାରଣ ସଂପାଦକ ସତ୍ୟବ୍ରତ ନାୟକଙ୍କ ସମେତ ଉକ ପ୍ରତିନିଧି ଦଳ ଗତ ବୁଧବାର ଠାରୁ ଗଂଜାମ ଗସ୍ତକରି କଂଗ୍ରେସ ପକ୍ଷରୁ ରିଲିଫ୍ ବଣ୍ଟନ କରିଛନ୍ତି।