ସମ୍ଭାବ୍ୟ ବାତ୍ୟା ମୁକାବିଲା ପାଇଁ ଜଳଭଣ୍ଡାରଗୁଡ଼ିକରେ ଆଗୁଆ ଜଳ ପରିଚାଳନା ପଦକ୍ଷେପ

ହୀରାକୁଦ ଜଳଭଣ୍ଡାରର ଉପରମୁଣ୍ଡରୁ ଆସୁଥିବା ଜଳପ୍ରବାହ ଯୋଗୁଁ ଜଳସ୍ତର ବୃଦ୍ଧି ପାଇବାର ସମ୍ଭାବନାକୁ ଦୃଷ୍ଟିରେ ରଖି ହୀରାକୁଦ ବନ୍ଧର ୫ଟି ଗେଟ୍ ଖୋଲାଯାଇ ଜଳ ନିଷ୍କାସନ ଆରମ୍ଭ କରାଯାଇଛି। ଏହାଦ୍ୱାରା ଆଗାମୀ ବାତ୍ୟା ପ୍ରଭାବରେ ସମ୍ଭାବ୍ୟ ବର୍ଷା ଯୋଗୁଁ ମହାନଦୀର ଉପରମୁଣ୍ଡରେ ବୃଦ୍ଧି ପାଇବାକୁ ଥିବା ଜଳପ୍ରବାହକୁ ସୁପରିଚାଳିତ କରିବା ସହ ଜଳଭଣ୍ଡାରରେ ଅତିରିକ୍ତ ଜଳ ଧାରଣ ପାଇଁ ସ୍ଥାନ ସୃଷ୍ଟି କରିବା ଲକ୍ଷ୍ୟ ରଖାଯାଇଛି।

ଏହି କ୍ରମରେ ବାଘଲାଟି ଓ ଘୋଡ଼ାହାଡ଼ ଜଳଭଣ୍ଡାରରୁ ମଧ୍ୟ ସନ୍ଧ୍ୟାରେ ନିୟନ୍ତ୍ରିତ ଭାବେ ଜଳ ନିଷ୍କାସନ ଆରମ୍ଭ କରାଯାଇଛି। ବାଘଲାଟି ଜଳଭଣ୍ଡାରରୁ ପ୍ରତି ସେକେଣ୍ଡରେ ୮୫ ଘନମିଟର ଏବଂ ଘୋଡ଼ାହାଡ଼ ଜଳଭଣ୍ଡାରରୁ ପ୍ରତି ସେକେଣ୍ଡରେ ୧୧୫ ଘନମିଟର ଜଳ ନିଷ୍କାସନ କରାଯାଉଛି। ଉଭୟ ଜଳଭଣ୍ଡାରର ଜଳସ୍ତରକୁ ପ୍ରାୟ ୬୦ ପ୍ରତିଶତକୁ ହ୍ରାସ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। ଅତିରିକ୍ତ ମୁଖ୍ୟ ଯନ୍ତ୍ରୀ, ଋଷିକୁଲ୍ୟା-ବାହୁଦା ବେସିନଙ୍କ ଉପସ୍ଥିତିରେ ସମସ୍ତ ମାନକ ପରିଚାଳନା ପ୍ରକ୍ରିୟା (SOP) ଅନୁପାଳନ ସହ ଜଳ ନିଷ୍କାସନ କରାଯାଇଛି। ଏ ସମ୍ପର୍କରେ ଶ୍ରୀକାକୁଲମ ଜିଲ୍ଲାର ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟଙ୍କୁ ମଧ୍ୟ ଅବଗତ କରାଯାଇଛି।

ସେହିପରି ବଡ଼ନାଳ ଜଳଭଣ୍ଡାରର ବର୍ତ୍ତମାନର ଜଳଧାରଣ ସ୍ତର ୭୮.୪୬ ପ୍ରତିଶତ ରହିଥିବାବେଳେ ପ୍ରତି ସେକେଣ୍ଡରେ ୧୦୨.୧୩ ଘନମିଟର ଜଳ ନିଷ୍କାସିତ ହେଉଛି। ଏହାକୁ ପର୍ଯ୍ୟାୟକ୍ରମେ ୧୭୫ ଘନମିଟରକୁ ବୃଦ୍ଧି କରାଯାଇ ନଭେମ୍ବର ୨ ତାରିଖ ଅପରାହ୍ନ ପର୍ଯ୍ୟନ୍ତ ଜଳ ନିଷ୍କାସନ କରାଯିବାର ଯୋଜନା ରହିଛି। ଏହାଦ୍ୱାରା ଜଳଭଣ୍ଡାରର ଜଳଧାରଣ ସ୍ତରକୁ ପ୍ରାୟ ୬୦ ପ୍ରତିଶତକୁ ହ୍ରାସ କରିବା ଲକ୍ଷ୍ୟ ରହିଛି।

ଅନ୍ୟପକ୍ଷରେ, ହରଭଙ୍ଗୀ ଜଳଭଣ୍ଡାରର ବର୍ତ୍ତମାନର ଜଳଧାରଣ ସ୍ତର ୮୫.୫୫ ପ୍ରତିଶତ ରହିଛି। ଏଠାରେ ପ୍ରତି ସେକେଣ୍ଡରେ ୨୫୭ ଘନମିଟର ଜଳ ନିଷ୍କାସନ ଜାରି ରହିଛି। ନଭେମ୍ବର ୨ ତାରିଖ ସକାଳ ପର୍ଯ୍ୟନ୍ତ ଏହି ନିଷ୍କାସନ ଜାରି ରହିବା ପରେ ଏହାକୁ ୩୬୦ ଘନମିଟରକୁ ବୃଦ୍ଧି କରାଯାଇ ସନ୍ଧ୍ୟା ପର୍ଯ୍ୟନ୍ତ ଜାରି ରଖିବାର ଯୋଜନା ରହିଛି। ଏହାଦ୍ୱାରା ହରଭଙ୍ଗୀ ଜଳଭଣ୍ଡାରର ଜଳଧାରଣ ସ୍ତରକୁ ମଧ୍ୟ ପ୍ରାୟ ୬୦ ପ୍ରତିଶତକୁ ହ୍ରାସ କରାଯିବ।

ସମସ୍ତ ଜଳଭଣ୍ଡାରରେ ଜଳ ନିଷ୍କାସନ ପ୍ରକ୍ରିୟା ସମୟରେ ନିର୍ଦ୍ଧାରିତ SOP ଅନୁପାଳନ ସହ ସମସ୍ତ ଆବଶ୍ୟକୀୟ ସତର୍କତା ଓ ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇଛି। ଜଳ ନିଷ୍କାସନର ପରିମାଣ, ଜଳଭଣ୍ଡାରର ଜଳସ୍ତର ଏବଂ ତଳମୁଣ୍ଡର ଜଳପ୍ରବାହ ଉପରେ ବିଭାଗ ପକ୍ଷରୁ ନିରନ୍ତର ନଜର ରଖାଯାଇଛି। ସମ୍ଭାବ୍ୟ ବାତ୍ୟା ପରିସ୍ଥିତିରେ ଜନସାଧାରଣଙ୍କ ସୁରକ୍ଷା ସହ ଜଳସମ୍ପଦର ସୁପରିଚାଳନା ସୁନିଶ୍ଚିତ କରିବା ଦିଗରେ ବିଭାଗ ସମସ୍ତ ପ୍ରସ୍ତୁତିମୂଳକ ପଦକ୍ଷେପ ଗ୍ରହଣ କରୁଛି।