୨୮ ନମ୍ବର ଓ୍ବାର୍ଡର ଚା' ଖଟି ଆସରରେ ଯୋଗଦେଲେ ମହମ୍ମଦ ମୁକିମ୍

ଭୁବନେଶ୍ବର, ୫/୧୧(ଭାରତ ପ୍ରସାରଣ): ଆଜି ଭୁବନେଶ୍ବର ମହାନଗର ନିଗମ ୨୮ ନମ୍ବର ଓ୍ବାର୍ଡ ସାଇନ୍ସ ପାର୍କ ଛକଠାରେ ଓଡ଼ିଶା ଜନତା କଂଗ୍ରେସ ପକ୍ଷରୁ ଏକ ଚା' ଖଟି ଆୟୋଜନ କରାଯାଇଥିଲା । ୨୮ ନମ୍ବର ଓ୍ବାର୍ଡର ଓଜେସି କର୍ମକର୍ତ୍ତାଙ୍କ ସଂଯୋଜନାରେ ଆୟୋଜିତ ଆଜିର ଏହି ଚା' ଖଟିରେ ଓଜେସି ସଭାପତି ଇଂ ମହମ୍ମଦ ମୋକିମ୍ ଯୋଗ ଦେଇଥିଲେ । ସକାଳ ସମୟରେ ଚା' ଆସରରେ ୨୮ ନମ୍ବର ଓ୍ବାର୍ଡର ବିଭିନ୍ନ ସମସ୍ୟା ଓ ଏହାର ସମାଧାନ ନିମନ୍ତେ ରାଜନୈତିକ ଉଦାସୀନତା ସଂପର୍କରେ ଆଲୋଚନା ହୋଇଥିଲା । ସ୍ଥାନୀୟ ଅଞ୍ଚଳର ଶତାଧିକ ଯୁବକ ଓ ମୂରବୀମାନଙ୍କ ଉପସ୍ଥିତିରେ ଭୁବନେଶ୍ବର ତଥା ରାଜ୍ୟର ଅନେକ ରାଜନୈତିକ ପ୍ରସଙ୍ଗ ସଂପର୍କରେ ଆଲୋଚନା ହୋଇଥିଲା । ଆଜି କୋରାପୁଟ ଜିଲ୍ଲା କୋଟିଆ ଅଞ୍ଚଳରେ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ ଜୋର୍ ଜବରଦସ୍ତ ନିର୍ବାଚନ କରାଉଥିବା ଏହି ଖଟିରେ ଅନ୍ୟତମ ମୁଖ୍ୟ ପ୍ରସଙ୍ଗ ହୋଇଥିଲା । କୋଟିଆ ପ୍ରସଙ୍ଗରେ ଦଳର ସଭାପତି ମହମ୍ମଦ ମୋକିମ୍ କହିଥିଲେ ଯେ, କୋଟିଆ ଓଡ଼ିଶାର ଅବିଚ୍ଛେଦ୍ୟ ଅଙ୍ଗ । କୋଟିଆରେ ଆନ୍ଧ୍ରର ଦାଦାଗିରି ପାଇଁ ପୂର୍ବର ବିଜେଡି ଓ ଏବେର ବିଜେପି ଉଭୟ ଦଳର ସରକାରଙ୍କ ଅପାରଗତା ଦାୟୀ ଅଟେ । ଓଡ଼ିଶା ଓ କେନ୍ଦ୍ରରେ ବିଜେପି ସରକାରରେ ଅଛି । ଆନ୍ଧ୍ରରେ ମଧ୍ୟ ବିଜେପିର ଭାଗିଦାରୀ ସରକାର ଅଛି । ତେଣୁ ଭାରତୀୟ ଜନତା ପାର୍ଟିର ନେତୃତ୍ବମାନେ ଏହାର ଆପୋଷ ସମାଧାନ ନିମନ୍ତେ ମନୋଭାବ ପୋଷଣ କରିବା ଉଚିତ୍ ।